Tubiret : tafaska «Γer di tmeγra», annar n tγuri i Ynelmaden

Tazrigt tis 8 n tfaska «Γer di tmeγra» tella-d di temkarḍit tamenzut n tγuri tazayezt Rabah Saidani di temdint n Tubiret. Irmad-a llan-d i lmend n yinelmaden i wakken ad d-sqerben γer-sen taγuri, idles, akk d temsizlin gar-asen ladγa segmi llan deg umaris si 15 Meγres ar ass-a. Ilaq ad neḥsu belli semmuset (05) n tezrigin timezwura llant-d deg uxxam n yedles Ali Zamoum, Kradet (03) tineggura uγalent ttwasedsunt di temkarḍit Rabah Saidani akka am tneggarut-a, tis tamet (08). Axxam-a adelsan azayez llan deg-s azal n 12 000 n yizwal n yedlisen, yerna cudden-d γer-s 1 000 n yimeltaγ. «12 n tesmilin, gar-asen yiwen i wid ur nsel ur nettmeslay, wayeḍ n tutlayin, (tamaziγt, taɛrabt, tarumit, taglizit, taspanyulit) ) d wid n tγuri d temsizlin i d-yellan di tfaska-a” akken i γ-d-tenna Massa Hocini Nassima,tanemhalt n temkarḍit.

Inelmaden, yellan deg yimuras iγurbizen, ttalmaden ad γren, ad arun, ad xedmen unuγen deg unnar n usgenfu d wuraren ur d-nusi yewɛar am wad-nni n uγerbaz. Tafaska-a ttekkent deg-s aṭas n tdukliwin d-yusan si twilayin tiyaḍ am Sidi Belɛabbas, Lezzayer tamaneγt, Bgayet, Clef. Yerna I wakken imḍebren n tfaska ad sqerben irmad-is γer tuddar d tγiwanin ibaɛden , yeneɛzalen, heggan-d yiwen n wallal n usiweḍ ara yawin idlisen d uraren alma γer imukan-a am Ɛǧiba, Dirah, Laxḍaria, Borǧ Uxris … Iswiyen n tfaska-a «d asḥemmel n tγuri d useqreb n wedlis γer inelmaden » d awal i γ-d tenna tanemhalt n temkarḍit.
Deg wakud I deg nella, anida taγuri tuγal twexxer s waṭas di tmurt-nneγ (macci aṭas n yemdanen i yeqqaren), timliliyin, tifaskiwin d tirmad am wi d ayen yelhan, yerna ilaq ad ggten ma nhegga-asen akken iwulem. Imusnawen d wid yettwaselγan i waya i wakken ad welhan imeẓyanen, ad as-nesḥemlan adlis d tγuri. Tayri n udlis d tγuri, d ccerṭ amezwaru, ayen niḍen ad d-yas iman-is.

Slimane Chabane

vous pourriez aussi aimer Plus d'articles de l'auteur

%d blogueurs aiment cette page :