Akayaḍ n 5, Tamaziɣt ulac, ulac, ulac …

Akayaḍ wis semmus (5) n useggas aɣurbiz 2017/2018  yella-d ass n 24 seg waggur n maggu I deg nella. Ulac deg-s Tamaziɣt  ɣas akken tutlayt-a tekcem deg tmenḍawt d tameslayt taɣelnawt tunsibt seg waggur n furar n 2016 yezrin. Ihi, nezmer ad d-nini belli “tamaziɣt d tutlayt taɣelnawt tunsibt” d aɣebbar s allen neɣ d akellex kan. *

Macci d aseggas neɣ sin aya segmi tekcem tmaziɣt ɣer uɣerbaz azzayri. Seg tuber 1995, 23 iseggasen aya, imi bdan yezzayriyen ad qqaren tutlayt tayemmat nsen. Ayaki yella-d seg ass mi i seblen azal n umelyun n yinelmaden aseggas seg lɛamur-nsen deg useggas n 1994/1995. Ass mi I d-yessiwel Umussu Adelsan Amaziɣ i usended n uqrab.  Rren-d tiɣri akk inelmaden i qqimen ur ɣrin aseggas i wakken ad d-tekcem tmaziɣt ɣer uɣerbaz.

tamaziɣt di llakul, deg tmenḍawt, ur d-tussi kan akka. Yella-d fell-as umennuɣ d ameqran yerra iḍul. Amennuɣ I deg llan leḥbusat, uzlen idammen, rrunt tlawin, jerḥen wulawen d wallen seg yimeṭṭawen. Mmuten 126 yergazen d tlawin di tefsut taberkant n 2001.

Ihi, ass-a, yekfa wurar, kfant tkerkes. Fell-as 23 n yiseggasen aya imi nesɣar tamaziɣt s wudem unsib deg uɣerbaz n lezzayer. Temsalt-a n ukayaḍ melba tamaziɣt ur nettuɣal ɣer-s, ur d-tettuɣal ɣer-nneɣ. Tikerkes kfant, akellex ifuk.Tamaziɣt tella, yerna ad tili, d nettat i d azar, d taɣerma, d idles, d tutlayt, d amezruy, s lebɣi-nneɣ , s lḥerma-nneɣ,  s trugza-nneɣ. Fell-as tudert, fell-as tamettant i lebda.

 

                                                                                    Slimane Chabane

vous pourriez aussi aimer Plus d'articles de l'auteur

%d blogueurs aiment cette page :