At Laɛziz (Tubiret), tiwizi i tezdeg n taddart

Imezdaɣ n taddart Iciḥawen deg tɣiwant n At Laɛziz, azal n 10 ikilumetren agafa n Tubiret, begsen i tezdeg n taddart-nsen. Aḥal n wussan aya, nitni d amahil : bennu, asizdeg n yizenqan, uẓẓu n yiseklan  …

Ilmeẓyen akk fkan-d afus iwakken yal yiwen ad yexdem ayen iwumi yezmer d wayen issen. Yella-d, di tazwara, ajmaɛ n yidrimen, yal wa imudd-d ayen umi yezmer. Syen akkin, uɣen-d allalen n lebni. Di teswiɛt i deg nella tura, atan iwḍan ɣer uḥric n usbeddi n texxamin ara yellin d iguduyen i ɣer ad ḍegren iḍuman n yexxamen n taddart.

Tiwizi-a tella-d s wemwatu n yimezdaɣ akken ma llan. Aya tella d lɛada ɣer Yimaziɣen, ladɣa di tmurt n Yeqbayliyen. « Macci armi d ass-a i tella twizi ɣer-nneɣ, ǧǧan-aɣ-tt-id imezwura, nekni ad tt-id-neǧǧ i yneggura » i yenna Ḥasen, yiwen seg yixeddamen i nemlal ass-a deg taddart n Yiciḥawen, At Buzzit n Ufella.

Iseggasen-a ineggura, aṭas n tuddar i deg nwala iɣermanen cemren ɣef iɣallen-nsen iwakken ad sizedgen tawenaṭ i deg ttidiren.

Ad nessarem ahat aṭas n tuddar n twilayt n Tubiret ara ytebɛan abrid-a. Wa d-yili iswi-nsen « d aseḥbiber d uḥader ɣef ayen i ɣ-d-yezzin d wayen anida ntedder » i yenna Ḥamid, netta d abennay. D wa ay d asiem n medden akk.  « Awi-d kan ad yili wemwatu, tagmat d tdukli » d awal kfan-t-id Maǧid d Racid .  

 

                                                                                                               Slimane Chabane

vous pourriez aussi aimer Plus d'articles de l'auteur

%d blogueurs aiment cette page :