Tubiret, axxam n yedlis yerra tajmilt i yemsewren iqburen

Axxam n yedlis Ali Zamoum n twilayat n Tubiret ihegga-d, ilmend n 03 wussan, rreḥba n tteswirat. Tazrigt-a, d tis 03, ad tili deg wussan n 17, 18 d 19 n waggur i deg nella. Ahil n usalun-a yeccur d timziknin n waṭas yemsewren d-yusan si 13 n twilayin. Tteswirat n lezzayer s umata d wallalen iqdimen n ussawer llan deg ussan n rrehba i d-heggan tanmehla n tmerrit, d waxxam n yedlis.

Deg ass amezwaru n wahil, ad d-illin, daɣin, tismilin i deg imusnawen ad selmden i wid ur nessin amek ara beddlen teswira, ad srekben avidéo, ad ferqen tafat d wamek tettwaxdem tteswira.

Ayen yernan ɣef aya, imsuddsen n usalaun-a, ad rren tajmilt i yemsewren iqburen n tiwilayt n tubiret. Gar-asen Ouchene Slimane, Graichi Mohamed d Zourdani Zinedine.

Deg ass wis 02, d asaru « axxam n yil » n Anis Mokdad ara ẓẓren yemferǧen. Asaru-a yewwi arraz wis 03, cciɛa n nḥas, deg  tfaska tagraɣlant n tteswira n Marseille, di Fransa.   

Deg ass aneggaru, d nnuba n warrac, ara ylemden assewer d wamek ara srekben tugniwin- nsen. Ad d-yili daɣin usarag ɣef yizerfan n wid i xeddmen deg uḥric-a n tteswira.

                                                                                              Slimane Chabane

vous pourriez aussi aimer Plus d'articles de l'auteur

%d blogueurs aiment cette page :